政情：胡錦濤探訪河北老年服務中心

國家主席胡錦濤今年春節都忙於視察。農曆年三十晚（二號）同兔年大年初一（三號），胡錦濤專程前往河北省保定市視察，特別喺年三十晚到訪位於保定市嘅楊受成慈善基金（順平）老年服務中心，向中心嘅老人同孤兒親切問好兼送暖，顯示國家對該中心服務嘅高度重視同肯定。有關探訪活動片段於大年初一晚喺中央電視台新聞聯播節目中以頭條新聞播出。

基金三度捐款共270萬

楊受成慈善基金（順平）老年服務中心早喺○八年底投入服務，主要為老人同流浪孤兒提供住宿同醫療服務。

英皇集團主席楊受成向來好關注老人善終服務，分別喺○九年同一○年透過旗下慈善基金，兩次捐資共一百七十萬人民幣，資助該中心嘅日常運作開支，而上月再加碼捐多一百萬人民幣以示支持。該中心距離北京約個幾鐘車程，建築面積達八千六百平方米，目前約住有四百名老人同孤兒。

早喺○七年，楊受成亦曾捐錢喺保定市興建兒童福利院同老年公寓，並獲該市市政府授予「保定市榮譽市民」稱號。