政情：建制派民望插水

政府倒行逆施搞到民怨沸騰，民望固然長期插水，黐埋去嘅建制派立法會議員都畀特衰政府拖累，民望應聲下滑。

港大民意研究計劃喺一月二十至三十一號分兩階段進行民意調查，尋日公布十大議員嘅最新評分，打入十大嘅三名建制派議員，包括新民黨主席葉劉淑儀、建仔主席譚耀宗同立法會主席，佢哋嘅評分較三個月前嘅民調結果顯著下跌。

葉劉嘅最新評分係五十七點九，較上次調查跌咗兩分，而譚Sir亦跌咗二點五分，只有五十一點九分。既然評分下跌，排位自然下滑，全部跌咗一級。葉劉由上次嘅第二位跌落第三位，譚Sir由第七位跌落第八位。

長毛評分排名輕微上升

至於早前退出社民連嘅黃毓民同「大舊」陳偉業嘅評分亦下跌，大舊更跌出十大添！反而畀人鬧爆冇退黨嘅「長毛」梁國雄，評分同排名都有輕微上升。

喺過去三個月以嚟，建制派無論喺堆填區廢法同申辦二○二三年亞運會，都同政府打對台、撐到行，仲同泛民主派聯成一線，企硬否決政府申亞。外界話鬧政府就有着數，點解建制派議員好似泛民上身咁，都竟然民望下跌？

鬼咩！明明喺呢兩單嘢同政府反咗枱，點知事後又應約去粉嶺別墅BBQ，仲欣然接受煲呔曾多謝佢哋喎。嗱！咪以為忽然泛民就掂先得㗎，建制派黐番埋呢個特衰政府就死梗啦，仲話燒烤喎，燒炭就真，簡直係死亡約會。

譚Sir以前曾經講過，建仔會是其是、非其非，畀市民睇清楚亦分清楚。事實上，市民真係睇得亦分得好清楚，就係佢哋披咗泛民件衫上身，骨子裏都係建制派，只係偶爾同特衰政府耍吓花槍、扭吓計，之後咪又搭晒膊頭，總之市民一日認定你係建制派，一世都係建制派，想洗底都好難。