包花紙貪好睇 唔環保更失禮

是日年初二，食過開年飯，正式踏入新一年。新年講新意，潮流興環保，人人都係地球村一分子，低碳生活可以由綠色新年開始。

拜年係農曆新年重頭戲，除咗「恭喜發財」、「萬事勝意」一類好意頭說話，禮物當然唔少得。不過咁，年年有餘固然好，千祈咪變咗年年製造垃圾就得嘞。

為咗吸引消費者，大部分商戶過年期間會免費提供包花紙服務。環保組織調查發現，有送禮盒習慣嘅家庭入面，近八成四會用花紙包裝。以平均每個家庭用五張計算，估計今年新年全港消耗花紙多達一千一百二十五萬張，加起來嘅總面積足夠鋪滿二百三十三個香港大球場。唔知要斬幾多樹至可以造咁多紙，係咪好得人驚呢？

奇就奇在，超過九成受訪市民都知道花紙唔環保，明知同綠色生活格格不入都照用可也。無他嘅，花紙免費送，商戶仲負責包埋添，梗係唔執輸，包得唔好嘥啦。

叮！正所謂小數怕長計，你又包，佢又包，年年係咁包，淨係花紙已經浪費大量天然資源，對環境造成嚴重破壞。港府高官成日吹水話要將藍天白雲還畀市民，支持綠色生活，其實得把口齋噏，頭痛醫頭，腳痛醫腳，根本冇減少同回收廢物嘅全盤計劃。除咗推出徵收膠袋稅措施，其他乜都唔去做，眼白白睇住大量紙張變垃圾，藍天白雲有乜辦法唔阿崩叫狗，愈叫愈走吖。

古人話齋，勿以惡小而為之，勿以善小而不為。保護環境應該從小事做起，就講農曆新年，團年飯、開年飯同春茗接着來，眼闊肚窄留低唔少剩菜殘羹，如果適當減少食物，既慳錢又唔會浪費，你話幾好呢。

仲有吖，過年封利是係傳統習俗，但印製新利是封同新鈔票都涉及大量紙張，如果利是封循環再用、以「環保鈔」代替新鈔，可以救番不知幾多樹同幾多森林。一句講晒，只要多花啲心機，加少少創意，農曆新年一樣可以過得既傳統又環保。

有調查發現，九成禮物唔係用鐵罐，就係硬盒加鐵罐做包裝。每逢新年，幾乎每個屋企都塞滿鐵罐、硬盒、包裝花紙、大膠袋，佳節一過又全部送晒去堆填區。試問環境局班高官，提高環保意識，推動綠色低碳新年，你哋度過幾多橋？推出過乜嘢措施呢？

包花紙貪好睇，唔環保更失禮。當局一味掛住做騷，推埋晒啲停車熄匙呢類唔等使嘅擾民措施，但對減少廢物就一事無成，好似減用花紙咁，連宣傳都慳番，搞到花紙氾濫，樹木有難，叮！