救人於危先講錢 縮骨政府太肉酸

送虎迎兔，新年又到。發財搵銀固然重要，身體健康、出入平安同樣唔少得，最緊要高高興興出門口，整整齊齊返屋企。

因埃及發生動亂滯留喺旅遊勝地樂蜀嘅逾一百七十位香港旅客，尋日坐中央政府安排嘅包機安全抵港。順利脫離險境，仲可以同家人開開心心食團年飯，直頭喜上加喜添啦。

不過有樣嘢講起來真係大殺風景。呢，港府前日宣布包機安排嗰陣，由頭到尾幾乎未離開過「錢」字，記者會變咗「收數通知發布會」。保安局副局長黎棟國開門見山，話明專機費用要以用者自付原則處理，打算搵旅遊業議會跟進機票費用問題；又話團友持有機票又買咗保險，唔驚走數；仲話會個別聯絡非團友港人處理機票費用，總之一味講錢。

叮！滯留埃及嘅港人可以甩難，對市民來講係大喜訊。但開心事經高官把口講出嚟，居然變咗好似追債咁，聽落唔止古怪，直頭心寒。連旅議會負責人都頂港府唔順，話非常時期唔應該先講金錢。

有立法會議員指斥港府犯下「三宗罪」，先係遲發黑色外遊警示，後來又冇派專機接人，家陣又斤斤計較，「唔通消防車出動救火救人都要收錢先！」

果然一針見血。查實，搞成今日咁被動捱打，完全係呢個縮骨政府自己攞嚟衰。上個禮拜五埃及政府截斷當地手機同網上通訊，旅遊業界已經覺得唔對路，一再要求保安局發出黑色外遊警示。但當局依然話情況「唔係好嚴峻」，只發出紅色外遊警示，後來發覺局面動盪先至將警示升到黑色。業界無所適從，幾乎畀當局玩殘。

最近幾日多個國家派包機撤走僑民同遊客，港府又唔肯認衰，仲搵啲站唔住腳嘅「技術理由」嚟敷衍市民，推卸責任。到中央政府派多架包機飛埃及接載自己同胞，當局至求北大人出手打救，卒之獲安排港人搭「順風機」返港。自己唔做，要中央政府代勞，港府完全冇承擔。

講來講去，當局始終進退失據。○八年泰國曼谷騷亂，港府太遲落實包機，被批評反應太慢；舊年聖誕英國暴風雪肆虐令大批香港留學生滯留，港府下巴輕輕話唔排除派包機接佢哋返港，結果畀人鬧到七彩。

人命大過天，計太一叮話齋，港府發外遊警示後知後覺，安排撤離見步行步，救人於危仲要斤斤計較，難為班高官尋日仲好意思高調去到停機坪接包機，做乜鬼騷吖，仲嫌唔夠肉酸咩。叮！