樓震驚魂一再現 屋署怎能懶懶閒

如果你喺屋企食緊飯，棟樓忽然起勢搖晃，連枱枱櫈櫈都係咁震，你會點諗？一定會諗起汶川大地震屍橫遍野嘅慘狀，嘩，走得快好世界呀！

呢種「樓震」驚魂，灣仔大王東街十八號居民有切身體會，呢棟四十四年樓齡嘅六層高唐樓三日內出現兩次震動，居民嚇到鼻哥窿冇肉。

都咪話唔驚，呢啲舊樓年事已高，要冧唔係冇可能。舊年一月底土瓜灣馬頭圍道嗰單冧樓事件，就夠得人驚啦，五層高嘅舊樓十秒鐘內變成頹垣敗瓦，造成兩死四傷悲劇，事隔一年好多人仲心有餘悸，家陣輪到自己層樓搖嚟搖去噃，點會唔驚呀。

事發之後，屋宇署派人嚟睇咗吓，就話冇即時危險，居民可以返屋企。不過咁，屋宇署班官員不嬲都滋油淡定，無論啲建築物有乜問題，都例牌話冇即時危險，所以對佢哋嘅話千祈唔好信十足。

咪以為太一叮危言聳聽，以土瓜灣冧樓為例，屋宇署出事前一個月仲實牙實齒話冇即時危險，但話口未完就出事。灣仔有個僭建大型招牌，佢哋亦話冇即時危險，點知一場颱風，就成塊跌落嚟砸死途人。屋宇署官員下巴輕輕，簡直係草菅人命！叮！

佢哋話，土瓜灣冧樓係因為裝修破壞咗樓宇結構，今次樓宇結構冇問題，據講係受附近嘅打樁工程影響。但係聽吓專家點講，香港專業教育學院建造工程學系主任陳子明話，據初步觀察，樓宇結構係冇問題，不過要留意有冇新裂痕，舊裂痕有冇加深。即係話，專家都唔敢保證冇事，叫居民點住得安心呀。

再講啦，千祈唔好睇小打樁工程嘅破壞力，有辦睇㗎。○八年上環利興樓就係因為隔籬大廈重建打樁變咗比薩斜塔咁款，搞到居民漏夜疏散，直情牙煙到唔使恨，後來進行咗加固工程，先至冇出事咋。今次除咗大王東街十八號外，灣仔利東街嘅一棟樓宇亦出現又深又長嘅裂痕，據講亦係受同一打樁工程影響。

所以，對今次樓震事件，屋宇署唔可以一句「冇即時危險」就關人個關。棟樓點解會搖晃？係咪打樁工程造成嘅？使唔使進行加固？居民使唔使疏散？呢啲都係關乎居民生命安全嘅大事，屋宇署絕對唔可以迴避。

人命關天，點可以咁兒戲㗎，如果棟樓住嘅係屋宇署高官嘅親屬，睇吓佢哋仲敢唔敢懶懶閒吖嗱。叮佢個鎯鎯！