政情：搞搞政：克勤仔兔年桃花惹是非

近期政圈多事，香港術數家協會術數師楊子東日前批算過一眾高官運程後，今日再批算咗一班立法會議員嘅運程，發現唔少建制派議員運氣麻麻，其中，建仔新秀陳克勤值得一提，事關楊師傅話，佢命格旺桃花，有情感波折及負面新聞。

嘩，桃花運對政界人士嚟講真係要好小心，好似維園阿哥任亮憲咁，楊師傅就話佢命格忌火土，傷官見官，小人是非不絕，官非未能解決，今年運程都麻麻，要捱過農曆五月及九月兩個難關並唔容易。再有傳出無理解僱女助理嘅白鴿黨甘乃威，兔年運勢未許樂觀，加上立法會就事件展開調查嘅報告極可能喺今年公布，但今年底就有區議會選舉，呢單嘢可能成甘威對手嘅狙擊點，所以今次區選佢都可能困難重重。