政情：棠哥養病勢缺席兩會
工聯會會長兼行政會議成員鄭耀棠頸椎移位病情惡化，影響右手同右腳嘅活動能力，或需進行手術治療。我哋報咗單消息後，棠哥嘅健康更備受關注，工聯會尋晚食團年飯，棠哥為咗專心休養，又係缺席聚餐，甚至嚟緊三月北京舉行嘅兩會，棠哥都可能無法出席，我哋惟有祝佢兔年身體健康，早日復出喇！
工聯會尋晚提早食團年飯，喺旺角倫敦大酒樓筵開三十幾席，員工開開心心食番餐，工聯會立法會議員黃國健（K.K.）送出現金同超市禮券各五百蚊畀大家抽獎，潘佩璆送現金一千蚊，王國興送包金立法會大樓模型，論心思，王國興贏晒。
K.K.話，今年三月北京舉行人大、政協「兩會」，身兼港區人大代表嘅棠哥可能都要告假，事關棠哥依家雙手無乜力，唔適宜拎行李，上到京又應酬頻繁，不利休養，唔多適合棠哥家吓嘅情況。
棠哥繼續休養，連尋晚嘅工聯會團年活動都冇出席。 （資料圖片）