政情：白鴿黨為選舉叫停搬竇

細屋搬大屋係唔少人嘅願望，一早揚言要搬竇嘅白鴿黨最近卻叫停咗搬屋大計，事關今年同出年都係選舉年，白鴿黨預咗一百三十個人選今年區議會，人數係創黨之冠。白鴿副主席單仲偕（雞）尋日落區派揮春時仲話，為對付由泛民衍生嘅「民建聯B隊」（即人民力量隊伍）嘅無道理狙擊，佢哋都預咗幾招應變，其中最大嘅變動就係暫停發搬大屋美夢。

雞話，佢哋已經向會參選嘅社區主任發出加碼津貼，亦為此要預留多啲錢。雖然白鴿黨嘅會址用咗十幾年，搞大會都要外出借場，但嚟緊兩場選舉涉及政壇勢力洗牌，所以佢哋預咗今年區選已經要比上屆加碼過百萬元資助，黨內又未決定派幾多個人選下年嘅超級區會議席，以最低成本二百萬計，如果出兩張名單已經四百萬，所以搬屋大計都要擱置。