政情：毓民大舊招死士區選惡搞泛民

虎年將盡，社民連分裂搞出一個新興組織「人民力量」，社民連創黨主席黃毓民講到兔年工作時，都明言會落實佢早已講過狙擊白鴿黨同民協嘅目標，據悉，知名度較高嘅毓民同大舊陳偉業極可能分別狙擊民協馮檢基同白鴿黨主席何俊仁（鐵頭仁），佢哋仲已經開始招攬基層隊伍輔選。毓民同大舊咁樣叫陣，泛民都好難同佢哋以和為貴啦。

兔年未至，人民力量已經動作頻頻，據了解，旨在為咗喺區選狙擊白鴿黨同民協而成立嘅「人民力量」，暫時已招攬到五、六十位死士出選。喺元朗、屯門一區有一定勢力嘅神州青年服務社，將會夥拍同樣退咗黨嘅陳偉業（大舊），統戰新西。一直都係雙料議員嘅大舊，極有可能喺區選狙擊鐵頭仁，目的係令鐵頭仁攞唔到超級區會議席嘅入場券，不過以大舊之力能否挑戰票王鐵頭仁呢，真係要拭目以待。

袁彌明下海挑戰甘乃威

而一直都冇喺深水埗開設議員辦事處嘅毓民，嚟緊將會喺元州邨同李鄭屋邨設立議辦，過年後就會正式開張。早前有傳民協馮檢基將棄守其根據地麗閣選區，轉戰李鄭屋，可見毓民此舉擺明係衝住阿基而嚟。毓民對此亦直認不諱，仲話喺「公投」時，曾喺阿基兩個票倉取下逾四千票，自己係有一定信心先去馬：「我計過度過先狙擊嘅，你去搞人，但最後搞唔到好樣衰㗎嘛！」咁講同公然踢館都冇分別。

「人民力量」成員組織「選民力量」亦會擔起喺港區狙擊白鴿黨嘅重任。據悉，佢哋將會派出前港姐袁彌明出戰中西區，挑戰喺該區扎根多年、又喺去年捲入「怒炒女助理」事件嘅白鴿黨甘乃威。聽講袁彌明今次處女下海並非為議席，純粹係想提醒吓班選民甘威嘅醜聞，等佢唔好咁易過關。泛民腹背受敵，呢個兔年真係唔易過。