危駕殺人不勝防 帶眼行路保平安

「路上零意外，香港人人愛」，呢句口號香港人耳熟能詳。之不過講就容易，真正做到就難嘞。事關香港道路交通真係冇乜安全保障，就連搭巴士都可以搞到有命去冇命返。

嗱，法院尋日判咗一個巴士司機入獄四年八個月，停牌三年，案情就夠得人驚啦。前年十一月，一架巴士喺將軍澳唐明苑對開迴旋處突然翻側，車廂滑行十幾公尺先至停低。車內乘客人疊人，情況恐怖到極，最終導致兩死三十四傷嘅悲劇。

法官直斥被告熟悉路線，明知要轉彎都冇減速，超出安全車速二十幾公里。咁樣揸快車，唔出事至奇。大佬，成車人嘅命都喺你手上呀，點可以亂嚟o架！

呢個畸士係按新例判刑嘅，刑期比以前同類案件長。不過，人死不能復生，判得再重又有乜用？死者家人內心嘅痛苦又點會咁容易撫平？正如一名死者家屬話齋：「喺我眼中點判都唔夠，佢只坐五年監，但我屋企人死時只有十五歲咋！」唉，一朵含苞待放嘅花蕾，仲未綻開就被摧殘，唔嬲就假嘞！

肇事司機聽到判決，即時腳軟。早知今日何必當初，搞到咁多人死傷，家陣仲要坐監，正一係害人害己。各位司機大佬，一定要以前車為鑑，千祈咪以身試法。

近幾年，香港地交通事故無日無之，血流成河，好多事故都因為司機飲酒濫藥後開車造成嘅。不過有唔少人冇隊酒，冇索Ｋ，揸車嘅時候不知幾清醒，可惜視交通規則如無物，隨心所欲開快車，卒之同樣車毀人亡。呢啲人同醉駕藥駕司機一樣，都係罪無可恕。

香港地真係無奇不有，大家聽過一邊瞓覺一邊揸車未呀？舊年大年三十，有個菜販揸輕型貨車送貨，經過大埔道嘅時候竟然去見周公，架車變咗無人駕駛，亂衝亂撞，一對揸電單車嘅夫婦當場被撞死，問你驚未！

話時話，政府呢幾年大張旗鼓打擊危險駕駛，點解仲會有咁多車禍？無他嘅，當局不嬲有法不依，執法不嚴，好似打擊危駕，修例後刑罰係加重咗，可惜最高刑期永遠形同虛設，咁搞法，再修多幾次例都係嘥氣。

所以啫，太一叮奉勸各位，出街時記住「馬路如虎口，交通規則要遵守」，咁仲未夠，因為你遵守規則，人哋唔一定遵守，最緊要係行路要帶眼，否則分分鐘被車輪壓扁仲唔知出咗乜嘢事。叮！