SUN世代：走出綠茵女國腳落區

前國家女子足球員韋海英是天生跑手，人生一直向前衝，十三歲開始馳騁綠茵球場，大小比賽都盡力將足球向着龍門送去，終於給她衝進廣東省女足隊、國家隊，更圓了奧運獎牌夢。退出球壇後，她的目標是發展本港地區服務，之前曾參加區議會選舉，雖然鎩羽而歸，仍繼續義務埋首社區服務：「服務社區係我鍛煉人生嘅好機會！」

韋海英跑步快，說話速度亦一樣快，盡顯其爽朗性格。記者問她的英文名為何叫「Neil」（音「了」），她即告之：「足球隊友話我好多嘢講，好似『了哥』咁，加上我身形又『裊』瘦，就叫呢個名囉！」女士最怕有甲組腳，韋海英馳騁球場多年，身形依然窈窕如昔，令人羨慕。

「喺足球生涯做咗好多想做嘅事，例如世界盃同奧運，無咩遺憾。」她二十六歲時決定退下來，跟隨丈夫在香港組織家庭。踢而優則教，她專注於貢獻本地球壇，雖身為香港女子足球隊總教練，同時也負責不同的青訓計劃，「主要教七、八歲嘅小朋友，依家有啲學生已經讀大學喇。」由於時常在九龍大坑東邨及石硤尾球場教踢波，一次偶然機會下，她跟朋友在區內當義工，激發她把衝勁轉移至地區事務。

「幫到老人家好有滿足感」

「深水埗區較多老人家，同佢哋傾吓偈已經好開心，有時我哋似心理輔導員，幫到佢哋好有滿足感！」韋海英○七年參選深水埗區議員落敗，但沒有氣餒，一心要服務居民，憑着運動員的毅力，她以南山居民服務協會主席的身份，繼續義務埋首社區服務。

深水埗有不少基層及長者聚居，而她亦非出身富裕家庭，更能體會基層街坊所面對的難題。所謂「老吾老以及人之老」，她由關心家姑，推廣至關顧區內的公公婆婆：「奶奶真係好捱得，天未光就去街市開菜檔，捱大幾個仔女，其他上一代嘅人都係差唔多。同一啲婆婆傾偈，擔心呢樣嗰樣，我都開解佢哋，行得食得就享受吓喇。」當運動員需要克服不少困難，現在要落手落腳服務街坊更不易：「以前有領隊、教練睇住，起居飲食唔使諗，踢好場波就得，依家咩都要一腳踢。」

她曾是體壇精英，十三歲時獲教練發掘其潛質，遂跟中學師姐到廣州集訓，加入廣東省女子足球隊。她表示，這決定其實是先斬後奏，「爸爸一直反對我做運動員，佢想我讀書考大學，所以我呃佢暑假要去跑田徑，去咗個幾月後，就寄信畀爸爸，坦白講晒所有嘢，等佢寄伙食費畀我。」

韋海英年僅十六歲便獲選為國家隊，成為中國女足史上最年輕入選球員。自此這名右翼前鋒不斷代表國家隊上陣，踢過亞洲盃及世界盃。最令韋海英自豪的，相信是踢奧運了。「一九九六年亞特蘭大奧運會第一次將女足納入比賽項目，我哋中國隊拎銀牌。」這面珍貴的銀牌，亦代表付出的青春與努力得到回報。

韋海英Neil小檔案

婚姻狀況：已婚，育有一子一女

現職：南山居民服務協會主席、香港女子足球總會總教練

公職（部分）：

大坑東居民服務協會秘書長、深水埗區議會地區設施委員會增選委員、公屋聯會委員

足球威水史（部分）：

第十一屆亞洲盃冠軍（九七年）、美國亞特蘭大奧運會女子足球銀牌（九六年）、第十屆亞洲盃冠軍（九五年）、第二屆女子足球世界錦標賽第四名（九五年）