政情：搞搞政：棠哥頸椎移位開刀十五十六

早前講過身兼行政會議成員嘅工聯會會長鄭耀棠，已經連續缺席三個禮拜行會會議，原來棠哥潛水背後，有不為外人道嘅隱衷。

棠哥喺舊年底已主動向傳媒自爆病情，話患上頸椎移位三個月，記者當時見佢身形激瘦逾十磅以上，臉、頸同膊頭都縮咗一個碼。佢嘅多年戰友、工聯會立法會黨團召集人KK黃國健向我哋證實，棠哥因頸椎移位，已經影響到右手同右腳嘅活動，雖然棠哥仍然有返工聯會開會，但行動已見不便，醫生建議長痛不如短痛，開刀以根除後患。

KK話依家內地做頸椎移位手術，已有豐富經驗，但做手術始終存在風險，棠哥最終會唔會決定開刀，又或者喺香港定喺內地進行，各位工聯會戰友都唔敢多口畀意見，都係等棠哥同屋企人好好商議，相信農曆新年後會有決定。

至今棠哥仍未扑錘接受開刀，心情十五十六。又難怪嘅，據骨科醫生所講，頸椎開刀並非小手術，有一定風險，一旦手術失敗，可能導致下身癱瘓。棠哥面對咁大嘅賭博，心情可能仲忐忑過係咪參選立法會「超級區議會」選舉呀！希望佢保重身體啦！