政情：蘇樺偉陳冬梅設計跑鞋
由香港業餘田徑總會同渣打銀行全力策動嘅「馬拉松101教育計劃」，早前邀請逾五千名中小學生，為千八隻巨型跑鞋模設計造型，殘奧會金牌得主、有「神奇小子」之稱嘅蘇樺偉同香港展能藝術會註冊藝術家陳冬梅，都攞起畫筆畫埋一份。
蘇樺偉謙稱唔擅長設計，構思圖案頗費神，最後敲定用殘奧標誌同跑道為主題，花咗三日時間，為巨型鞋模塗上繽紛色彩。繪畫多年嘅陳冬梅對畫鞋駕輕就熟，雖然要以腳代手執筆，但佢嫌畫一隻未夠喉，要求畫夠一對，仲以大自然為主題，為鞋模繪上綠草、藍天，又加上lace鞋帶，感覺清新。陳冬梅話畫夠一對鞋模，寓意一男一女，喺人生路上互相扶持。
講到二○一一年大計，蘇樺偉戰意高昂，笑言有信心攞到倫敦殘奧入場券。陳冬梅就計劃開個人畫展，又希望去廣西做義工喎！
蘇樺偉（左）同陳冬梅（右）各自畫出心目中最鍾意嘅巨型跑鞋造型。