政情：特首辦拍河蟹片呃自己

眼見通脹加劇、百物騰貴，對小市民嚟講真係年關難過，依家隨街訪問幾個市民，都知佢哋滿肚牢騷。特首辦facebook「上亞厘畢道」日前就訪問咗唔少市民過年嘅心情，但千祈唔好對條片有乜嘢期望，皆因佢哋嘅「傑作」相當「河蟹」，受訪者個個對通脹或本港嘅社會問題隻字不提，條片更營造到香港歌舞昇平、人人有工開咁，刻意平衡社會氣氛。

特首辦推出嘅facebook專頁「上亞厘畢道」一直劣評如潮，唔少市民都批評政府正經事唔做，浪費納稅人嘅錢搞埋啲無謂嘢。「上亞厘畢道」尋日更有新作，搶埋記者份工，喺街上做街訪，聲稱話要了解市民新一年嘅願望喎。

一味唱好市道

不過，特首辦嘅官員剪片時就唔知有心定無意，片中全部受訪者都冇希望政府解決貧富懸殊、樓價高企同通脹等等嘅問題，一味講香港有幾好，總之就你有你怨，我有我講，又係政府漠視民意一大力證！