政情：李鋈麟冒寒拜會統戰部
身兼北京市政協委員嘅李鋈麟，早前以灣仔中西區工商業聯合會創會主席身份帶隊訪京，拜會中央統戰部副部長尤蘭田。北京凍到零下十度，李鋈麟隨手攞起旅遊巴上一支水想解渴，點知經過一晚夜，蒸餾水凍到變冰條。
北京寒風刺骨，的確令人吃不消，李鋈麟帶定厚皮草抗寒，總算冇冷親。擔任副團長嘅李鋈麟弟弟李鋈發就相當體貼，抵達北京當晚帶眾人去火鍋店食消夜，有米落肚，凍到震嘅團友們即時醒神晒。
此行仲有另一特色，就係有一晚入住位於平谷區嘅四合院，呢度係一間大型國企公司嘅培訓中心，平時唔招呼外賓，部分團友原來未住過四合院，感覺新鮮又好奇。
李鋈麟（左）帶隊訪京，獲中央統戰部副部長尤蘭田（右）接見。 （李鋈麟提供）