政情：沈祖堯寸唐唐鬧得過火

喺上個月中，曾經畀年輕人掟鞋嘅政務司司長唐唐，早前喺一個青年學術會議上忽然對住「80後」發炮，指摘年輕人唔好「搞思想壟斷」，更加唔應該對持相反意見嘅人口誅筆伐，否則「剛愎自用加上勇往直前，最後很容易車毀人亡」！言論一出，全港頓時嘩聲四起，之後有年輕人向唐唐抗議，仲帶埋架紙紮車畀唐唐做禮物，點知畀唐唐話「留番你第日自己用」。

平日處事「條條fing」嘅唐唐忽然發難，講出懶振振有詞嘅呢番「車毀人亡」論，下場係點？中大亞太研究所尋日公布嘅民調結果顯示，唐唐最新評分跌破合格水平，得四十九點四分，真係自作自受；連帶另外兩位司長以至成個政府一齊陪葬，評分全線下跌。

累政府民望急跌

就喺呢個民調公布之前，頗得中大學生歡心嘅校長沈祖堯尋日接受電台訪問時，只係話現今只有小部分年輕人採用激進手法抗爭。被問到唐唐對「80後」嗰番言論，沈校長冇正面回應，但就話大部分學生只係關心自己嘅成績，同埋將來嘅工作等，對社會問題反而關注唔多。

沈校長冇正面回應「車毀人亡」論，可能係唔想捲入呢個政治漩渦，但佢嘅講法頗有暗撐年輕人嘅意味，亦即係同唐唐唱反調啦！事關若然大部分年輕人都唔關心社會問題，即係反過嚟告誡唐唐何必用咁激嘅言辭鬧嗰啲少數年輕人呢？如今唐唐咁樣靠嚇，咪顯得有啲小題大做囉！

不過，身為青年事務委員會主席嘅陳振彬就另有睇法，佢覺得唐唐講嘅只係「肺腑之言，一片好意」，目的都係提醒吓年輕人，即使評分下跌，亦只係佢嘅官職使然。無論點都好，唐唐同政府民望急跌係事實，再唔吸取教訓同自我反省，最終車毀人亡嘅怕且係唐唐自己呀！