平機妖孽濫權　打壓傳媒可恥

平機會代表一名抑鬱症及妄想症患者濫告《太陽報》及東方報業集團，指○六年一篇專欄文章涉嫌中傷精神病患者，違反《殘疾歧視條例》，前日區域法院裁定指控不成立。平機會無理取鬧，浪費公帑，社會各界紛紛聲討，炮轟當局打壓傳媒，手段卑鄙。

法官直斥平機會嘅指控誇大其詞，還太一叮清白，平機會敗訴係自取其辱，最無辜嘅係東方報業，贏咗官司卻要破財，竟要自行支付一百四十萬元訴訟費，簡直匪夷所思。

叮！平機會係又告唔係又告，唔止無理取鬧，直頭無法無天喇。成件案根本係無中生有，正如執業大律師龔靜儀質疑，「一篇文章冇可能大家睇完會有咁大差別！」係咯，呢件案根本唔需要乜嘢證據，淨係閱讀文章，就可以作出類似法庭嘅合理判決。平機會斷章取義，貿然提出檢控，唔止對被告唔公平，簡直係濫用公權力，打壓傳媒。

講開又講，平機會無理取鬧已經唔係第一次o架嘞。早年佢哋曾經未查清投訴內容，就發信要求並冇涉及殘疾中傷嘅《太陽報》進行調解，後來經本報自行舉證，平機會至發現自己搞錯，涉事嘅其實係另一份報章。叮，平機會懵盛盛，點止張冠李戴，直頭係插贓嫁禍。

龔律師講得啱，如果一收到投訴就要雙方調解，只求安撫投訴人，並冇充分體現平等對待嘅精神。嗱，平機會連最起碼嘅平等精神都唔識，仲唔係掛羊頭賣狗肉？不如拆咗個招牌罷啦！

仲有吖，平機會一向大花筒，尤其係前主席鄧爾邦，損公自肥，醜聞纏身，家陣仲搞到係唔係都亂告一通，簡直罪加一等。正如立法會議員王國興話齋，今次事件反映平機會嘅判斷有問題，事實同指控不符，就唔應該隨便動用納稅人金錢進行無謂訴訟，久唔久就來滋擾一次，用行政手段打壓傳媒，係唔應該同不得人心。

冇錯喇，打壓傳媒絕對係不得人心，特別係當局經常選擇性針對東方報業集團，更加係卑鄙無恥。城市大學專業進修學院學術統籌宋立功話，當局用呢啲非常手段打壓傳媒，唔止直接衝擊本港新聞自由，而且今次東方畀平機會誣告，要耗費大量時間同金錢，會削弱東方嘅競爭力。作為一間上市公司，畀平機會亂告，影響盈利，連小股東利益都受損喇。

所以話，餘孽濫權，遺禍無窮。正因為港府一邊打壓正義傳媒，另一邊包庇誨淫誨盜嘅壹淫媒，先至搞到香港烏煙瘴氣。有人質疑，港府選擇性針對東方報業，不斷騷擾，背後係有不可告人嘅政治目的，就係要搞到東方煩不勝煩，自動放棄。到時咯喎，一係被人收購，一係被人合併，香港從此成為反中亂港傳媒嘅天下，港英餘孽又少咗個眼中釘，咪一天都光晒囉。

諗落都唔係冇可能o架，事關兩間免費電視台都不明不白易咗手咯，如果有人打報紙主意，亦都好正常啫。反正今時今日愛國愛港冇前途，反中亂港有運行，大家不如齊齊反中亂港好過喇！