政情：搞搞政：夾心人Rita硬銷競爭法
競爭法立法工作已拉開序幕，未入正題啫，有份推銷嘅商務及經濟發展局副局長蘇錦樑已經同政黨擦出火花，政圈都睇緊主力推呢條法例嘅局長劉吳惠蘭（Rita）做硬夾心人，事關申亞有辦你睇，政府高層猛壓迫，但政黨就睬你都傻，莫講話呢鋪商界同民間又撐到行，Rita想好過都唔容易。
官場傳話，政改一役同申辦二○二三年亞運會喺中、高級公務員眼中，都認為政制及內地事務局局長林瑞麟同民政事務局局長曾德成因誤信「老闆」，而被跣到攤攤腰，主要原因係政府高層只顧拍板，唔肯做實務，由得個局長自己去頂，搞到政府中人尤其係半高唔低嗰啲，對政府誠信嘅信心大動搖。
競爭法同以上兩條法例唔同嘅係，商界同商會對呢條法例嘅關注更深、更敏感，如果事件重演，Rita真係好難全身而退。