政情：周一鑊署任CS 港人大鑊
農曆新年將至，官場中人爭放假，搞到再現十個煲九個蓋嘅情況，搞到有名每周一鑊嘅食物及衞生局局長周一嶽要署任政務司司長（CS）四日半咁多。近日流感疫情嚴重，公立醫院都被攻陷咁滯，周一鑊仲要戴多頂帽，得唔得㗎？
呢個署任安排既令人心驚，亦好少見，事關政務司司長嘅署任工作一向係由官場拆彈高手、教育局局長孫明揚頂上，不過，農曆年在即，孫公早兩日都攞假，喺二十六及二十七號放兩日假抖吓，咁啱，政務司司長唐英年都即刻接力，攞咗二十七號到三十一號上晝放假，佢哋嘅假期重壘咗一日，結果政務司司長嘅署任工作就落到去周一鑊頭上囉。
三司十二局中，仲有一向識歎、放假踴躍過人嘅環境局局長邱騰華由三十號（年廿七）到下個月八號（年初六），橫跨成個兔年，民政事務局嘅德成局長亦相若。