政情：劉鳴煒又有醫療界公職

華人置業副主席劉鳴煒近年擔任嘅公職愈來愈多，繼去年獲政府委任為中央政策組非全職顧問及關愛基金成員後，尋日又獲委任為健康與醫療發展諮詢委員會成員。呢個係食物及衞生局下面一個重要委員會，負責就醫療改革及公私營合作等棘手問題向政府出謀獻策。

尋日政府宣布咗十三位非官方成員，除劉鳴煒外，仲有好多醫學界猛人，包括醫學會前會長謝鴻興、醫學專科學院主席梁憲孫、中大護理學院院長李子芬外，仲有熱衷搞私家醫院生意嘅前行政會議成員陳智思等。身為富豪二代嘅劉鳴煒雖冇任何醫學背景，但舊年十月一改低調作風，發起「香港精神大使」運動宣揚逆境自強，唔知呢啲工作同今次委任有冇關係呢？

舊年出任華人置業副主席嘅劉鳴煒，去年十二月傳出與妻子分居，正辦理離婚手續，佢一直未有就婚變回應，今次做多份公職，睇嚟佢已經收拾心情，專心發展事業。