政情：長毛兩邊撐被寸牆頭草

社民連嘅內鬥風波愈捲愈大，創黨主席黃毓民同大舊陳偉業退黨後，政圈都瞄準社民連唯一立會議員「長毛」梁國雄會唔會退黨。不過，抬棺材、衝警察路障冇有怕嘅長毛呢鋪卻一反常態，連日來不置可否，尋日專登開記者會解釋帳目，都唔肯再講退黨，難怪畀網民揶揄佢變咗牆頭草，咁樣心大心細落去，長毛不如拈花問前程好過喇。

長毛尋日大講自己喺事件中嘅帳目問題，期間被問到黃毓民嘅帳目搞到廉署介入時，長毛好義氣咁拍心口話，佢對退咗黨嘅黃毓民同大舊投下百分之四百嘅信任票，堅信佢兩個唔會做犯法嘢。佢仲幫黃毓民解釋，話舊年公投完咗，黃毓民已即時畀番張四十四萬蚊支票社民連，只係「收錢嗰方無收錢」。仲話由嗰一刻起，黃毓民已唔存在欠錢問題。

廢噏離婚喻籌款

照佢嘅說法，當時係社民連冇收錢？真唔真㗎？咁係咪社民連嘅問題呢？長毛又冇指摘個黨噃。反而解釋，人哋指摘佢哋三人拖欠社民連永久會址基金嗰六十萬，其實呢筆錢係畀成個「公投」運動，協議係三子同成個黨都有責任幫手籌番，但家吓黃毓民、大舊已經退黨，已經無義務幫手籌啦，佢仲話：「分開咗仲有咩責任呀？等於養仔女一樣，離咗婚仲有咩責任養仔女？是但一個有之嘛。」呢個比喻唔止錯，直頭係不知所謂。

成個記者會上，長毛一陣幫呢個講嘢，一陣又幫嗰個講嘢，自己嘅立場就似霧似花，不過，社民連主席陶君行都冇作特別表示，仲認同長毛話，希望近期有關社民連嘅風波可以畫上句號。佢哋嘅美好願望可唔可以實現，家吓仲好難講，但長毛以拖字訣迴避問題就好明顯嘞。