政情：政改立法開快車就兩會

立法會審議政改本地立法草案委員會尋日已極速完成逐條審議嘅工作，主席譚耀宗仲特地預告，話過年後委員會將要加開會議，以便三月二日可如期恢復草案二讀，叮囑同僚預留時間，做足心理準備。

話聲一落，有白鴿黨議員即時詐晒型，話當日除要審議停車熄匙嘅草案外，仲有最低工資兩項公告同帳目委員會針對直資學校嘅報告要處理，萬一再將本地立法都塞埋入議程內，分分鐘玩成三至四日，建議譚Sir唔好咁心急。雖則係咁，譚Sir仍然企硬，僅話會喺本周六同政府嗰邊再商討。

全國政協及全國人大會議將會喺三月初開幕，萬一草案拖到月中先恢復二讀，身兼人大、政協嘅議員定必焗住京港兩邊飛，難怪都係政協嘅譚Sir咁心急喇！

但譚Sir否認敦促委員會開快車係為咗避兩會，指草案嘅審議工作已做得七七八八，但承認萬一個會一拖，會難為班「雙料」議員，譚Sir話：「如果一延期，我哋就要兩邊走啦！都幾麻煩㗎！」咁又係，事關要自己「科水」買機票吖嘛！