政情：搞搞政：選民力量借鴿打鴿

搞選舉有兩樣嘢係必須嘅：人同錢，缺一不可，相信揚言要狙擊白鴿黨嘅「選民力量」都心知肚明，依家佢哋已經有準備參選嘅人，嚟緊只係差錢。

選民力量今日開始喺維園年宵擺檔賣扇，最貴嗰款就係一千零一套，八把畫上八仙過海漫畫版白鴿黨立法會議員嘅扇，白鴿黨主席鐵頭仁就變呂洞賓，黃成智做韓湘子！呢套「鎮檔之寶」底價已經要五千蚊。星屑醫生話只此一套嘅八仙過海版紙扇，希望為選民力量籌到過萬元。此外，佢哋仲會賣有白鴿黨黨員肖像嘅吹氣棒同咕。

佢哋狙擊白鴿黨嘅同時，又借白鴿黨議員嚟籌錢，係咪好有三國時代赤壁之戰，諸葛亮想出草船借箭，先挫強國魏嘅銳氣咁呢。之後，佢哋當然係想燒乳鴿喇！

話口未完，本來打算狙擊白鴿黨甘乃威嘅選民力量成員袁彌明話，依家考慮變陣挑戰白鴿黨黃碧雲同梁美芬，實行女人打女人，令黃碧雲冇得再借性別議題發圍，究竟佢哋能否好似蜀吳咁以弱勝強？大家拭目以待。

講開維園，年中上映嘅立體三級電影《3D肉蒲團》都準備殺入嚟，而且租咗攤檔，仲喺現場掛咗套電影嘅宣傳banner，到時除咗女主角到場宣傳，更會即場播放電影預告片，但食環署尋晚話，維園空間有限，須避免人流聚集，已將禁播令通知檔主。