政情：田二少住籠屋體驗貧窮

新民黨副主席田北辰最近放下身段拍真人騷，轉行做清潔工，既要倒垃圾，又要捱麵包兼住籠屋，體驗三日兩夜窮人生活。咁辛苦都捱過，難怪尋日佢出席長者家慈善基金《襪襪送》「冰上行開幕禮」活動時，為體驗窮老人冬天冇襪着之苦，即席除襪騷腳趾，再赤腳行冰，全程笑笑口無痛苦。

今勻做窮人嘅田二少，完全體驗捉襟見肘之苦，事關佢每日得五十蚊使費，搭車用咗二十蚊，每日得番三十蚊開餐，真係唔夠食，所以佢本嚟打算由千三蚊嘅籠屋搬去間租金七百蚊嘅梗房，點知嗰度冇電冇熱水，仲要同曱甴同眠。點住啫！？惟有食慳啲囉，每日啃麵包同飲水就算。

田二少話掃樹葉係最難，要踎喺度執，仲有人廿四小時實佢，冇得偷懶。見佢喺個預告片度大嗌條腰爭啲斷，睇怕佢老婆見到心痛死。不過田二少話佢冇打番屋企同老婆訴苦，事關攰到冇心機打，每日一撻落床就瞓到不省人事。