政情：陳巧文鬧市露肉反皮草
兔年出世嘅社運人士陳巧文尋日化身為比堅尼兔女郎，喺銅鑼灣鬧市呼籲大家捨棄皮草，將動物皮毛還番畀佢哋嘅主人。着得非常裸露嘅陳巧文話，咁多人望當然覺得尷尬，但為咗動物都冇計喇！
陳巧文同埋三位社運朋友，應善待動物組織嘅邀請寬衣解帶，換上白色比堅尼上身、超短熱褲加一對兔耳朵，立即成為銅鑼灣嘅亮點，唔少途人經過都嘖嘖稱奇，紛紛拎出手機影相。
首次為組織獻身嘅陳巧文話，以前都着過皮造嘅鞋，但以後都唔會咯！佢希望今次可以喚醒大家關注，將來買仿皮服飾或者二手皮製品就算，減少扼殺無辜小動物嘅生命，事關佢咁樣企喺街度即使幾凍、幾尷尬，都及唔上可愛嘅兔仔咁慘。
陳巧文（左二）連同三位朋友化身性感兔女郎、兔公子，呼籲大家唔好着皮草，令途人側目。