政情：當黑發叔初二照求籤

仲記得○三年嘅農曆年大年初二，民政事務局前局長何志平以一身黑衣打扮，喺車公廟為香港運勢求得支令人惴惴不安嘅下籤之後，由○四年開始求籤嘅重任就由「新界王」鄉議局主席劉皇發代行，佢曾經喺○九年求得下籤，搞到人心惶惶，但舊年就為香港求得中籤，總算不過不失喇！不過，發叔喺過去幾個月是非纏身，啲是非仲好似蜜蜂咁針住佢唔放，「黑氣」未散，嚟緊嘅年初二仲會唔會去求籤呢？

「先難後易」幾貼切

發叔被委入行政會議後，初頭幾個月無風無浪，但早前就爆出漏報事件，搞到滿城風雨，近日村代表選舉，佢更加係五十年嚟首次競逐龍鼓灘村代表遇到對手，隨後仲有好多暗湧，出現「倒發叔潮」，仲威脅到佢可能連村代表、鄉事會主席、區議會當然議席同鄉議局主席等一Ｑ清袋，形勢確實好嚴峻。

所以佢喺過去幾個月可以話係「當黑」，好多人都擔心如果繼續由佢去車公廟求籤，會唔會唔係幾好意頭？之不過，佢嘅運勢近嚟似乎有啲好轉，至少喺事前一片唱淡下，佢最終以高票當選村代表。

再講，發叔上次喺車公廟求到嘅籤，籤文講到「先難後易，凡事可許」，雖然呢支籤係為香港而求，但套用喺佢身上都幾貼切。正所謂「拜得神多自有神庇佑」，可能發叔都深明呢個道理，所以佢喺選村代表當日早上都特登走去拜一拜神。結果？大家都知嘞！

咁仲使乜怕當黑啫！所以發叔嚟緊嘅農曆年大年初二都一如以往擔當去車公廟求籤嘅重任，到時沙田區議會主席韋國洪同沙田區議會前主席蔡根培都會陪伴在側。唔知到時佢除咗幫香港運勢求籤外，仲會唔會希望車公保佑佢事事順利，尤其係令佢可以成功連任鄉議局主席呢？