再次放生淫賤黎 影視處無法無天

餘孽護淫出晒面，淫媒淫過翻尋味。壹淫媒旗下網站發放嘅短片，再次因為掛羊頭賣狗肉宣淫販賤，畀淫褻物品審裁處正式評為第二類不雅物品。但影視處又再玩放生，唔怪得人哋話，朝中有人好宣淫販賤咯。

爛果報網站動新聞上月二十六日上載咗一段名為「大咪俾人(目及) 平胸亦自信」嘅短片，話就話勸女性唔好因為胸細而自卑，但介紹乳房杯型嗰陣，條片播出多幅女性胸部特寫性感相，期間出現一幅外國女人裸胸露點相，無遮無掩。露點相直到淫審處將短片暫評為第二類不雅物品之後至被刪除，本月二十二日短片正式被評為第二類不雅物品。

法治社會，違法必究。根據本港法例，發放不雅物品係刑事罪行，初犯者最高罰款四十萬元及監禁一年，再犯者最高罰款八十萬元及監禁一年。市民都期望影視處有法必執，檢控裝「胸」作勢嘅淫媒。

點知影視處尋日話，由於網站負責人已刪除短片不雅內容，合乎互聯網供應商協會業務守則嘅要求，所以唔會採取進一步行動喎。

咦，乜聽落熟口熟面嘅？查實呢次已經係壹淫媒喺短短三個月內，第二次因網上短片宣淫被淫審處評為第二類不雅物品，第二次獲影視處放生。

舊年十月，壹淫媒旗下網站一段叫「如何自行檢查乳房」嘅短片，以教人預防乳癌為名，拍攝女子裸胸檢查，四分鐘片段幾乎全部大特寫，乳房、乳暈同乳頭都冇打格仔處理。短片被淫審處正式評為第二類不雅物品，但影視處居然話唔會採取進一步行動，理由係網站已經加上適當警告字句，合乎業務守則要求咁話。

叮！一件污，兩件穢，壹淫媒三個月內兩度喺網上發放宣淫短片，挑戰法律底線，影視處竟然一次又一次唔檢控玩包庇，縱容壹淫媒為禍社會。

正如淫褻物品審裁處審裁員龔靜儀話齋，事件明顯顯示影視處執法不嚴，已有足夠證據都唔採取行動，向公眾發出錯誤訊息，變相鼓勵人「博大霧」違法，「就算僱員偷僱主錢，都唔係填番條數就無事啦，照樣有法律責任」。

刪除有關內容或者加番警告字眼就可以過骨，直頭離晒譜。如果當街偷嘢斷正，放番低贓物就話冇事，做賊零風險，咁豈不是人人都可以去偷去搶？叮！

話時話吖，有港英餘孽照住，宣淫販賤真係冇風險㗎。呢，壹淫媒旗下刊物違反《淫褻及不雅物品管制條例》過百次，鋪鋪都係罰一萬幾千就算數，莫講話冇阻嚇力，直頭罰款當成本啦！

淫賤黎宣淫販賤零風險，影視處變相做幫兇，簡直無法無天，香港遲早會淪為「淫獸都市」！