SUN世代：為慈善早啲起遲啲瞓

今屆保良局主席呂鈞堯（Quincy），率領龐大的慈善機構，工作忙得透不過氣，但他沒說過一句辛苦。這種刻苦性格原來是在掌管家族生意時磨練出來。雖是太子爺，但他幫忙打理父親創立的公司時，仍從工廠、貨倉做起，鍛煉出「捱得」精神：「對比上一代，我哋呢啲點叫辛苦！無論做生意做善事，都一定要盡心盡力，做到最好！」

斯文俊朗的Quincy，擁有典型富二代外表，但他並非「得個殼」，而是才能與內涵兼備，個性踏實吃得苦。雖然樣子年輕，但他已加入保良局八個年頭，於去年四月接任為今屆主席，上任為了盡力做到最好，不惜擱下父親一手創立的興泰紙業，把所有時間投放於慈善服務。

盡力籌款幫助窮學生

身為保良局主席，既要出席數不盡的活動，又要巡視服務單位、接受訪問，還要開會、翻閱厚厚的文件等，經常一天連趕三四場，有時連早、午、晚餐都要在會議中度過。Quincy說：「做咗保良局主席差唔多九個月，生活好似打仗咁，好彩時間係由自己掌握，如果多嘢做，我會早兩個鐘起身，遲兩個鐘瞓覺，工作時間多咗，咪冇咁忙囉！而且我嘅工作好有意義，令我覺得日日都過得好充實！」

做主席時遇到的感動故事，成Quincy工作原動力，他說：「最難忘係有次做面試官，負責批獎學金畀有需要嘅學生讀大學，見咗好多貧窮嘅學生，印象好深刻！佢哋個個都好叻、好有自信同抱負，只欠一個機會。但可惜資源有限，只有一部分可以獲批獎學金，有機會上大學，實現理想。諗起嗰啲失望而回嘅學生，我就好希望盡力去籌多啲善款，幫助多啲有需要嘅人！」

由低做起捱苦悟珍惜

擔任慈善機構主席工作排山倒海，Quincy由始至終都沒有說過一句辛苦。而他捱得苦的性格，是因協助父親打理家族生意時磨練得來的。他在加拿大西門菲沙大學完成大學課程後，到父親的紙業公司幫忙，但一切由低做起：「一開始喺工廠做工人、喺貨倉搬貨，之後坐喺門口做接待，又試過喺街做Sales。」

那段日子，Quincy除了學懂捱苦外，對慈善亦有所領悟：「嗰時接觸到好多唔同嘅人、唔同嘅事，學到好多嘢，令我唔覺得辛苦，因比起上一代，我哋呢啲點叫辛苦！當時亦深深感受到一分一毫得來不易，粒粒皆辛苦，無論賺錢多與少，或者善款大與細，都要好好珍惜！做生意定做善事，都一定要盡心盡力，做到最好！」

呂鈞堯小檔案

Quincy Lui

年　　齡：34歲

婚姻狀況：已婚

學　　歷：加拿大西門菲沙大學

現　　職：保良局主席

座右銘：敏於事、慎於言、滿招損、謙受益