政情：譚Sir競爭法小組開壇
競爭法立法工作牽一髮動全身，各政黨都好重視，建仔尋日就成立咗個專責研究競爭法嘅小組，小組主席竟然係連競爭法草案委員會都冇入嘅黨主席譚耀宗。點解咁搞笑？或者係因為建仔黨內不乏反對競爭法嘅人士，其中代表中華出入口商會嘅「象哥」黃定光，更多次喺會議上炮轟有份處理立法工作嘅商務及經濟發展局副局長蘇錦樑，為免黨員失控，咪搵譚Sir坐鎮囉。
建仔尋日召開首次競爭法小組會議，成員包括象哥、李慧琼、陳鑑林同黨內多名律師及專業人士。譚Sir話，小組嚟緊會邀請學者、負責條例嘅黨友、商務及經濟發展局副局長蘇錦樑同各大商會嘅代表，深入研究競爭法，預計至少會開五次會左右。
譚Sir話，佢哋暫對競爭法仲未有立場，小組未來會將收集到嘅意見向中委會反映，再決定該黨嘅投票意向。