政情：扮嘢文沙膽一飛沖天
人稱「扮嘢文」嘅海洋公園主席盛智文創意無窮，繼以殭屍、皇帝同孟婆等造型亮相後，尋日又有新玩意，彈上近二十呎高空搞噱頭，為咗搞新意思，佢真係乜都夠膽試。
海洋公園嘅「夢幻水都」尋日率先安排傳媒入場先睹為快，開幕一刻，扮嘢文竟然匿埋唔見人，直至司儀叫佢個名，一位着住七彩太空衣嘅老外忽然現身舞台前，迅即呯一聲彈上近二十呎高空，全程約三十秒。以「一飛沖天」方式打響頭炮，可謂先聲奪人。
其實個太空飛人就係扮嘢文，佢背脊孭住一個噴射器，似乎係靠強力氣流推動飛天，就連拍武俠片常用嘅「威吔」都慳番。
