政情：搞搞政：棠哥行政會議三連缺

行政會議成員係尊貴嘅公職，逢禮拜二都會討論或決定一啲對香港發展好重要嘅議程，不過，最近三個禮拜，卻唔見非官守成員、工聯會會長鄭耀棠嘅蹤影，原來佢做咗三次逃會威龍，我哋向政府查詢，政府卻一副懶理嘅態度。

棠哥兩個月前受頸椎移位問題困擾，身形暴瘦，連續缺席行會，令人擔心佢病情惡化。但據悉，棠哥如常返工聯會工作，氣色良好，唔似有事。我哋向行政會議方面查問所有行會成員嘅出席率，得到嘅答覆係：「行政會議係機密嘅。」至於成員嘅請假有冇一套法則規管，一樣冇答案。

其實，行會成員除咗職責重要外，亦唔係義工，召集人每月可九萬九千蚊酬金，普通成員亦每月六萬二千蚊，以平均每個月有四個禮拜二計算，每次開會收一萬五千蚊酬金㗎，市民有權監察噃。

講開又講，鄉議局主席劉皇發近期都一連兩次做咗逃會者，事關發叔早前因打邊爐後肚屙，搞到好大件事，所以一連兩次缺席行會。