政情：克勤仔助理招搖立會
立法會大樓一向有嚴格管理，市民如要入內影相必須事先申請，如果唔係同立法會事務有關嘅事未必獲批。不過，建仔立法會議員陳克勤嘅一位議員助理卻被指涉違規，事關facebook一個群組最近貼咗呢個議員助理嘅相，其中有佢着住大學畢業袍企喺立法會大樓天台嘅相，克勤仔亦被指「縱容親信」違規。
克勤仔承認，相中人係佢嘅助理，但強調下屬冇違規，話助理啱啱完成註冊社工課程，當日着住畢業袍去立法會同佢開會，之後喺大樓內嘅走廊同天台影相，唔認為有問題。咁嘅解釋真係令人費解，立法會秘書處就認為：「根據現行安排，議員、議員助理同秘書處職員都可以去相中嘅地方。」可以去，又係咪可以公然影相？仲咁招搖擺上facebook，秘書處點講都講唔清。