政情：史泰祖五口共用牙刷

新民黨早前成功創黨，副主席史泰祖偷得浮生半日閒，一家五口去咗東非肯尼亞旅遊，不過佢哋由香港經曼谷飛肯尼亞首都奈羅比時，喺曼谷竟然畀機場人員錯誤卸低咗成團人嘅行李，各人去到肯尼亞先發現唔見晒啲行李，捱咗三日先攞番啲嘢。

不過，史泰祖嘅影響相對細，佢話自己經常離港出差公幹，習慣咗趕時間，甚少將行李寄艙，今次遊肯尼亞都係拎手提行李上機，不過家人就受影響，結果佢支牙刷要一家五口共用。據佢話，當地都有便利店，買牙刷唔係難事，但買內衣褲替換就比較困難，而且當地早晚溫差大，日間都幾熱，幾日唔換衫肯定一陣味。

肯尼亞有乜嘢玩？佢哋去咗赤道地標、大地裂谷（Rift Valley）及多個野生動物保護區，包括紅鶴湖（Lake Nakuru）、瑪沙瑪拉（Masai Mara）等，同獅子、大象、花豹、犀牛及水牛等動物近距離接觸，好得㗎。