政情：勁踩阿陶大舊 白鴿抽水

近排政壇嘅熱話就係社民連內鬥不息，不過，有心人留意得到，內鬥嘅幾大主角都同白鴿黨有深厚嘅淵源，尋日立法會開大會，白鴿黨議員「肥仔明」李華明講起件事都有唔少感慨，既指陶君行份人太心急，去到邊個黨都惹火；又話「大舊」陳偉業等指摘白鴿黨係「共產黨B隊」，反指對方搞嘅人民力量誓言要狙擊泛民，咁咪係「民建聯B隊」？

肥仔明嘅態度，其實反映咗唔少泛民議員對社民連內鬥嘅態度，唔係「踩」就係「彈」。肥仔明尋日話，阿陶其實係一個有能力嘅人，但衰在份人太心急，如果唔係依家可能可以坐穩白鴿黨九龍東第二把交椅，佢一退休個位實係阿陶接棒咁話。睇番阿陶嘅經歷，佢喺白鴿黨時，試過喺司徒華名單入面排第三出戰立法會，後尾卻話頂唔住大佬文化而拉隊離場。過到去前綫又同劉慧卿意見分歧，之後去社民連，做到主席又鬧出倒閣風波，最終得到乜呢？

「人民力量係民建聯B隊」

佢之後講到近日退出社民連嘅大舊同黃毓民，咁啱得咁蹺，大舊都曾經係自己人，肥仔明冇特別講大舊嘅作風，但就好不齒佢哋句句鬧白鴿黨係「共產黨B隊」，但所作所為卻係狙擊泛民人士，肥仔明都唔客氣咁話，佢哋嘅人民力量可能係「民建聯B隊」就真。佢仲話，唔覺得大舊同毓民真係會狙擊白鴿黨，認為對方只係出嚟抽水，仲「賭乜都肯」添！

至於有啲人成日揸住「五區公投」嗰五十萬票嚟做文章，肥仔明話，當日「五區公投」佢都有份投票，但呢票絕對冇授權嘅意思，反擊有人「挾持咗50萬票自己用」。社民連內鬥，喺泛民內部造成嘅裂痕真係唔少，嚟緊一場A隊、B隊嘅較量恐怕先係主菜。