市民眼睛最雪亮 豈容餘孽護淫媒

壹淫媒宣淫販賤，一早就搞到天怒人怨，過街老鼠人人喊打，但係淫賤黎死性不改，反而變本加厲，喺刊物賣弄色情不特止，又將魔爪伸向互聯網。嗱，爛果報網站動新聞最近播放咗一段名為「大咪俾人 平胸亦自信」嘅短片，話勸喻女士唔好因為乳房細而自卑喎，其實咪又係掛羊頭賣狗肉，家陣卒之被淫褻物品審裁處正式評為第二類不雅物品。

壹淫媒果然夠淫夠賤，短片喺介紹乳房杯型嘅時候，用快鏡播出多幅女性胸部大特寫性感照，更離譜嘅係突然閃出一幅一名外國女人裸胸露點嘅相片，乳房同乳頭都清晰可見，擺到明係裝「胸」作勢，賣弄色情。

其實，壹淫媒因網上宣淫被淫審處評為第二類不雅物品已經唔係第一次。舊年十月，壹淫媒旗下網站以「如何自行檢查乳房」為名，播出一套女子裸露胸部嘅短片，四分鐘片段全程冇打格仔，乳房大特寫加上搓揉按壓，乜都有齊，結果被淫審處正式評為第二類不雅物品。

壹淫媒明目張膽喺網上宣淫販賤，直情係挑戰法律底線，按道理唔可以姑息縱容。勢估唔到，影視處居然話相關網站已經加咗適當警告字句，合乎業務守則要求，所以不擬採取進一步法律行動。

喂，根據本港法例，發放不雅物品係嚴重刑事罪行嚟o架，初犯者最高罰款四十萬元及監禁一年，再犯者最高罰款八十萬元及監禁一年。壹淫媒已觸犯法例，影視處以改咗警告字眼為由唔檢控，擺到明係製造灰色地帶，縱容淫媒繼續宣淫。

叮！港英餘孽阿芝阿佐唔執法，淫賤黎更加係膽生毛，呢，唔夠三個月又重犯被捉到正嘞。影視處話會就今次被正式評為不雅嘅短片作適當跟進喎，但係邊個敢擔保佢哋唔會又玩放生呀。身兼淫審處審裁員嘅大律師龔靜儀就講得啱嘞，如果影視處今次再度縱容，就係姑息同不公嘅表現，更會令公眾以為在同類事件毋須負上法律責任。

其實，就算影視處真係檢控，到頭來可能又係高高舉起、輕輕放低。太一叮絕對唔係杞人憂天，壹淫媒旗下刊物違反《淫褻及不雅物品管制條例》超過一百次，邊次唔係罰一萬幾千就算數呀，有鬼阻嚇力咩，何況淫賤黎早就將罰款當作成本啦！

叮佢個鎯鎯！淫賤黎以為同港英餘孽狼狽為奸，就可以蒙混過關，但係市民嘅眼睛係雪亮嘅，無論淫賤黎點樣裝「胸」作勢，無論影視處點樣幫「胸」做幫兇，一定逃唔過市民雪亮嘅眼睛，睇吓佢哋今次夠唔夠膽亂嚟！