政情：德成局長林公公做沙包冧建制派

特區政府呢輪真係弱不禁風，衰嘅政策一籮籮，先有堆填區廢法，後有申亞撥款泡湯，偏偏政府一味死撐，仲要強衝立法會，搞到建制派好尷尬，見沉船唔跳好傻啫，唔跳又綁住一齊死，結果建制派人人心口有道氣，尋日政府高層特別喺粉嶺嘅行政長官別墅搞咗個BBQ宴，仲搵埋政制及內地事務局局長林瑞麟同民政事務局局長曾德成向大家「耍冧」，即使畀人鬧吓、出吓氣，做沙包都要喇！

搞BBQ和頭酒

尋日山長路遙遠入去嘅議員都唔少，包括建仔、工聯會、經濟動力、專業會議同五散人等，雖然各門各派都有，但BBQ宴喺十零度低溫下舉行，大家又要喺戶外捱凍，唔畀北風吹到變雪條，都縮吓縮吓喇，和頭酒嘅效果有幾好真係令人存疑。

尋日除咗議員外，仲有林公公同德成局長陪客，另加特首辦嘅職員，大家喺別墅坐咗四圍枱，席間風花雪月外，會唔會唔講政事呢？正所謂，有啲嘢講得太明就冇意思，係人都知高官一向親疏有別，呢個建制BBQ既有穩固陣營之意，又有為未來政改本地立法拉盟友之意，所以林公公、德成局長做陪客之外，都預咗要聽吓建制派嘅不滿，尤其係嗰啲死撐政府、得失民意嘅黨派。

喺申亞失敗後，德成局長同跳船黨嘅議員關係肯定有裂痕，尋日飯局上，佢嘅表情亦難免木口木面，好似心中條刺仲喺度，而林公公嚟緊要搞政改本地立法，佢明知必須死攬建制派先過到關，所以尋日嘅表現好生鬼，出盡板斧冧啲建制派，呢個陪客真係唔易做。