政情：「政壇剩女」哪吒好事近
區議會選舉將至，唔少疑似參選人都趁呢段時間搞活動爭取曝光。退出富貴黨冇幾耐嘅「哪吒」方國珊尋日就搞咗個團年夜飯同班街坊聚一聚，佢契媽張人龍太太同契爺胡楓都有去撐場，「哪吒」講笑話，新年願望係唔做「政壇剩女」喎。
剩女充滿貶意，「哪吒」點解自認剩女？佢喺之前加咗政壇兩個字，似乎暗示家吓一人單拖嘅日子唔耐喇，咁新一年，佢宣布「嫁人」或者結束單身日子嘅時間應該近了，只係佢唔肯透露到底入邊個陣營。尋日嘅活動喺將軍澳新都城筵開十一圍，同班街坊食團年飯，場面唔細，又有一向錫佢嘅契爺契媽撐場，「哪吒」都好開心。