政情：搞搞政：鬍鬚曾又寸青年 攞嚟衰

本港青年關心政事，政府本來話積極聆聽，近期卻好似大改策略，先有政務司司長唐英年鬧青年激進會「車毀人亡」，惹嚟各界批評後，財政司司長鬍鬚曾尋日繼續吠，雖然冇出言鬧人，但借向「90後」青年講領袖之道嘅機會，又係教訓人唔可以拒絕溝通、唔可以唔聆聽，甚至唔好咁激烈，唔通佢哋以為咁嘅姿態又係同青年溝通咩？

鬍鬚曾尋日去咗香港基督教青年會嘅一個青年領袖活動，席間大談領袖要有「溝通、社會承擔及務實」，仲引英國已故首相邱吉爾嘅名言話，「站起來說話要有勇氣，坐低聆聽也需要勇氣」，不過，佢講嚟講去，都係要話畀人聽「拒絕溝通，不但對自己毫無好處，也有違香港整體社會嘅利益及香港精神」。結果現場有位男同學隨即寸番鬍鬚曾，話除咗說話同坐低聆聽要勇氣外，「聽完之後去真心消化都需要勇氣」，搞到鬍鬚曾聽完頓時面色一沉。

其實鬍鬚曾尋日嘅說話不外帶出一個訊息：近期佢遇到一啲激烈嘅提意見手法，但唔會為一時掌聲去做嘢，仲話對派糖呢個說法「反感」，咁佢又知唔知市民都對無情高官反感呢？