政情：富貴黨拖狗遊行谷新人
山頂係富貴黨嘅老巢，亦係富貴黨兩大巨頭田北俊同「莎姐」周梁淑怡家居所在之地，近日山頂出現狗兇手，但一路都未破案，尋日富貴黨搞咗個「愛心狗狗山頂行」，聯同三、四十個愛狗之人，拖咗廿幾隻狗仔遊行，抗議警方辦事不力，至今仲未捉到半山毒狗案嘅犯人。
尋日嘅活動，兩位副主席「莎姐」同方剛都有出席，不過，醉翁之意不在酒，個活動全程都充滿谷新人上位嘅味道，明眼人一睇就知，富貴黨區議會山頂選區疑似候選人陳浩濂先係主角。
不過，「莎姐」尋日都表現得好興奮，話晒佢都係愛狗之人，曾經養過四隻狗，其中兩隻係領養返嚟，以前由兩個女負責照顧，不過囡囡相繼出嫁後，連狗仔都嫁埋過去喇。
「莎姐」話，養狗對小朋友有好處，因為可以等佢哋愛惜生命。
