政情：楊哲安自爆馬拉松威水史

渣打馬拉松下月二十日舉行，今年四位副局長及政治助理包括商務及經濟發展局副局長蘇錦樑（Greg）、運輸及房屋局副局長邱誠武、教育局政治助理楊哲安（Jeremy）及保安局政治助理盧奕基組成「問責制四人組」落場，尋日仲約埋一齊練跑添。

Jeremy、阿Greg同阿盧尋日八點十五分左右，約埋喺朝早到寶雲徑集合，三個人準時着短褲跑鞋嚟到熱身，然後向東面司徒拔道跑去。一跑至知，年輕嘅Jeremy去勢凌厲，做過紀律部隊嘅阿盧亦寶刀未老，阿Greg就落力跟貼。

跑到中途，Jeremy仲教阿Greg同阿盧使用路邊嘅公共健身器材，做起來有板有眼，原來Jeremy十年前已喺英國倫敦跑馬拉松。佢話，當年幾萬人一齊跑，沿途經過好多倫敦著名地標，幾經辛苦跑到白金漢宮終點站，反而近年好少跑，只能返屋企湊女當舉重。