政情：施榮忻私房花膠大升值
百仁基金主席兼菁英會創會會長施榮忻，位於赤柱舂坎角嘅二千幾呎安樂窩近日入伙，較早前優先招呼菁英會班兄弟妹參觀新居，兩公婆仲親自下廚炮製福建家鄉「施」房菜，包括炆鮑魚、蘿蔔炆牛坑腩、福建滷麵同香煎牛扒等，個個食完都讚不絕口！
除咗鮑魚外，炆花膠都係施榮忻嘅拿手好戲。講開又講，佢屋企收藏咗好多巴基斯坦出產嘅靚花膠，最大隻係三頭半，即一斤唔超過四隻，大部分喺三年前以金融海嘯價三千八百蚊一斤買入，依家每斤升值到萬幾蚊。佢話花膠含豐富骨膠原，男女啱食，相當有益，所以保值係其次，健康至係無價。
施榮忻一家三口（左五、六及七）同菁英會一班兄弟妹嚟張溫馨合照。左起為林智彬、洪為民、傅明憲、白富鴻；右起為莊家彬、霍啟剛、王文博、楊華勇。
炆鮑魚
香煎牛扒
福建滷麵