政情：保良高球賽車禍遲開波
尋日早上約十點半，清水灣道近將軍澳坑口迴旋處發生車禍，搞到封晒路，當時好多前往參加保良局喺清水灣鄉村俱樂部搞嘅慈善高爾夫球賽嘅嘉賓都受阻，保良局主席呂鈞堯都唔例外，好彩冇遲到。
最後高球賽被迫延遲約一個鐘至開始，但冇影響一眾嘉賓打高球嘅興致，十七隊參加競賽，每隊四人，加埋其他善長捐款，順利為保良局籌得逾一百萬元善款。
呂鈞堯（右）同總理林潞拍住上，為保良局籌款。
