政情：橄欖爭取汽水機唱通街

最近有網民喺facebook貼出一張建仔觀塘區議員施能熊成功為街坊爭取汽水機嘅橫額，橫額上面除咗有當事人個名之外，仲印咗佢哋九龍東立法會議員「橄欖」陳鑑林個名。唔少網民都有留言揶揄，話呢啲小事根本唔應該大事宣傳，亦有網民話呢啲宣傳招數已經將區議會選舉工程發揮到登峰造極！

施能熊尋日話民生冇小事，加上真係有需求，做區議員一定要努力爭取；橄欖就話爭取汽水機唔係自己功勞，佢亦唔介意人哋點講，因為外界根本唔會知地區街坊有乜需要，即使喺別人眼中微不足道嘅設施，可能都係區議員花咗好多心機先爭取到，所以唔覺得呢條橫額有乜問題。

年底就係區議會選舉，各個有意參選嘅人都肯定出盡奇招增加曝光率，橄欖話呢類網上留言即使陸續有嚟都唔出奇，佢相信網民好多都有智慧，識得好好利用互聯網，唔會逞一時之快，將互聯網簡化成只得娛樂一種用途喎！