政情：搞搞政：貓紙簡述辛亥革命 Pauline 又捉蟲

早前都講過立法會秘書長Pauline吳文華獻新猷，喺立法會每周例會嘅動議辯論提供參考資料，等班尊貴議員睇咗呢份「貓紙」之後喺發言時能夠更言之有物，但自此麻煩多多。

上次辯論「釋放劉曉波」，因為秘書處只係發咗一張A4紙參考文件，泛民議員已炮轟秘書處自我審查，「令劉曉波貓狗不如」，點知事隔三個月又捉蟲。

辛亥革命今年踏入百周年，有議員喺下禮拜三嘅例會提出相關動議辯論，泛民同建制派議員分別提嘅修訂已經令原動議面目全非，班議員見到都頭暈，但收到秘書處提供嗰份貓紙後，班議員可能仲㷫。

點解？雖然份貓紙有五張A4紙咁多，但講及辛亥革命嘅背景資料得二百字都唔夠，仲簡短過議員提出嘅原動議，當中連孫中山嘅遺訓亦隻字不提，其他資料都只係講吓香港民主發展同保育辛亥革命建築。

各政黨因為唔同嘅政治立場，無謂嘅事都拗餐飽，更何況呢啲政治敏感嘅議題，份貓紙搞成咁，睇怕呢次Pauline等住捱鬧啦！