政情：小恩子撐老爺筆戰莫乃光

話說前全國人大常委曾憲梓就王丹來港問題發完炮後，本身係香港互聯網協會主席嘅莫乃光喺facebook留言，矛頭直指年屆七十七歲嘅曾憲梓：「他朝此廢物拉柴，最好甚麼人也不准來。」仲咁寫話：「其實，將有過萬人、十萬人送華叔，此廢物只是眼紅。此廢物的確是港人少數黑心地想佢伸直的，還敢口出狂言！」遣詞造句都幾激，同網上嘅憤怒青年有得揮！

事件餘波未了，曾憲梓「星級」新抱「小恩子」黎瑞恩尋日凌晨發雌威，代老爺出頭還擊莫乃光。小恩子喺微博話：「莫乃光作為主席，我以為都是有知識、有德行之能士，亦應該明白言論自由之可貴。」仲反問莫乃光：「用言語來詛咒一個八十歲嘅老人家是我們應樹立給下一代的榜樣嗎？」

莫乃光話冇睇過小恩子嘅微博留言，強調自己唔係對曾憲梓人身攻擊。但隔咗一粒鐘左右，佢卻喺facebook留言，話如果對曾憲梓嘅評論，引起小恩子不快，謹此致歉，明顯轉咗口風：「用上一啲詞語引人誤會，是在下不當。」但佢強調冇詛咒之意，「只係分析各人逝世之時嘅不同情況」；又話「堅持反對八十歲老人家反對WD（王丹）來港悼念另一位幾乎八十歲已故老人家嘅言論」，仲問番小恩子點睇？莫乃光話中有話，呢個道歉唔知小恩子接唔接受呢？