政情：爆袋巾傑區選 公文袋內鬥

社民連內鬥不絕，同佢哋一齊搞「五區公投」嘅公文袋，內部問題一樣唔少，公文袋執委會早前達成共識，反對直選議員轉戰功能組別區議會「超級議席」，呢招其實係內鬥招數，只為阻截另一立法會直選議員競逐超級區議會啫。尋日公文袋內部有消息傳出，新任黨魁「袋巾傑」梁家傑正密鑼緊鼓部署競逐超級議席，今年底仲會參選區議會黃大仙橫頭磡選區添，如果屬實，咁袋巾傑咪即係自打嘴巴！

公文袋嘅消息話，循九龍東直選入立法會嘅袋巾傑，有意出戰年底區議會選舉，連選區都揀好，係黃大仙橫頭磡選區。袋巾傑依家喺橫頭磡有立法會議員辦事處，由佢嘅助理打點，喺一啲大型街坊活動，好似最近「歡樂滿東華」籌款咁，佢亦有現身，仲捐五千蚊畀自己即場獻唱，討好街坊，睇嚟呢個消息並非無風起浪。

我哋問過袋巾傑，佢矢口否認部署參選區議會，指唔排除幾位新執委中，有人提出要推翻唔畀轉戰功能組別嘅議決，但佢唔會同意，估計係有人放流料，想試探佢嘅參選去向咁話。

建仔黎榮浩未驚過

所謂空穴來風，未必無因，而且消息仲係嚟自公文袋內部添！係咪流料？到公文袋報名區選至知。袋巾傑依家同人講，係助理正部署緊出戰橫頭磡，但行軍打仗，兵不厭詐，公文袋到區選報名前一刻換人都好易啫。大家不妨放長雙眼睇吓袋巾傑係咪想偷食，乘勢選超級區議會議席。

橫頭磡區議員係建仔嘅黎榮浩，佢尋日一聽到袋巾傑或想挑戰嘅消息，表現得相當興奮，話係就更加好嘞，佢喺○三年咁艱難都贏到，○七年自動當選，如果喺今年區選搵到袋巾傑祭旗，明年要求建仔派佢出戰立法會，黨內預選嗰關實過關啦！