官僚麻木不仁 長者晚景淒涼

有句俗語叫壽星公吊頸嫌命長，其實，喺現實生活中，嫌命長嘅人真係有o架。尤其喺香港，人均壽命愈來愈長，但港府就涼薄到冇朋友，搞到好多長者晚景淒涼，老無所依，老無所養，生不如死。

呢，前日又有一位九十歲老伯企圖跳海尋死，途中同的士司機講咗一句，「我要去死，送我最後一程啦！」好彩的士司機醒目，專登落車叫泳客睇實老伯，結果老伯跳海時，被一位日籍女士救番。嗰位見義勇為嘅日本人慨嘆，香港長者好淒涼，希望政府多啲援助，對長者好啲。

叮，香港長者淒涼，幾乎搞到全世界都知，港府知唔知醜吖。最羞家嘅係，香港唔係貧窮地區，而係一個富裕城市，喺呢個所謂天堂裏面，唔少打工仔為社會繁榮貢獻一生，到頭來竟然孤苦無依，好似被社會拋棄咁，臨老唔過得世，唔淒涼就假！

話時話，螻蟻尚且偷生，生命係寶貴嘅，自殺絕對唔啱，但一個人如果到咗求助無門嘅地步，唔想死又可以點做呢？唉，惟有自力更生咯，所以，有老人家執紙皮維生，有老人家打劫博食皇家飯，有老人家八十幾歲仲要頂硬上揸小巴搵食……真係要幾荒謬有幾荒謬，要幾淒涼有幾淒涼。對佢哋嚟講，香港絕對唔係天堂，簡直係地獄。

雖然人間悲劇不斷發生，但政府一於闊佬懶理，除咗靠把口齋噏敬老愛老，最多係咁意推出啲小恩小惠，例如長者醫療券吹到天花亂墜，但係每人每年得嗰二百五十元，擺明就係敷衍市民，搵老人家笨。

正如學者話齋，香港嘅老人福利遠遠不如其他發達地區，為咗應付人口老化，政府除咗加強安老措施外，仲應該推行全民退休保障。可惜啊，全民退休保障講咗咁多年，政府仲係推得就推，拖得就拖。

講開又講，人口老化不斷加劇，全民退休保障勢在必行，政府庫房水浸，依家仲唔做嘢，幾時先至做嘢吖。咪話太一叮唔提醒，如果繼續拖落去，呢個計時炸彈遲早爆嘅咋，到時全香港都冇運行！

好事不出門，醜事傳千里。香港長者好淒涼，連外國人都睇唔過眼，睇怕香港好快臭名遠播，由天堂變地獄。好心港府咪再大隻講，攞出良心，做好安老工作啦，叮！