政情：殷曉靜台胞酒會響頭炮
新春酒會開始登場，中聯辦日前喺大會堂美心酒樓舉行香港嘅台灣同胞新春酒會，焦點之一係啱啱到任約兩個禮拜嘅中聯辦副主任殷曉靜，佢首次公開亮相就孭重飛，事關當晚唔見中聯辦副主任黎桂康現身，由殷曉靜主持大局。
殷曉靜來港係分管台灣事務，等黎桂康可以專注做本地嘅協調工作，為未來幾場選舉做準備。呢一晚係台胞新春酒會，台灣幫自然成為酒會主角，席上亦見同台灣關係密切嘅名人如城大校長郭位、珠海學院校長張忠柟、前中大校長金耀基等，基本法委員會副主任梁愛詩、全國政協常委陳永棋均有撐場，曾任中總會長嘅陳有慶、霍震寰前後腳嚟到，福建幫頭領楊孫西、洪祖杭、施子清同盧文端亦冒住寒風現身。
殷曉靜着住桃紅色套裝公開亮相，令現場更添喜氣。
廣東幫陣容都唔弱，左起為王國強、戴德豐、陳有慶、霍震寰同陳永棋。