政情：象哥統籌初二放煙花
農曆年初二放煙花已成為本港大事，今年有份贊助嘅香港海南商會為咗畀市民一個難忘嘅回憶，特別邀請咗立法會進出口界議員「象哥」黃定光做煙花顧問。象哥話，近期經常忙於開會商討放乜嘢種類煙花、場地及嘉賓安排、電視直播時間等，仲要諗辦法減低成本，相信要忙到初二放完煙花後至得閒。不過，象哥都計劃忙完並睇完作品後，初三就會去中山間度假屋，到時仲會搵埋鄰居、工聯會會長鄭耀棠搞個新春雀局，趁機放鬆吓。
今年冬季零舍凍，象哥就以中式棉襖保暖，佢話件棉襖係去年到上海旅行時經朋友介紹度身訂造，薄薄地但好夠暖，人工包料只係四百蚊人民幣，平靚正，當時佢太太亦訂造咗件「小鳳仙」旗袍。
象哥做咗初二煙花顧問，要到初三先可以上中山度假。