政情：唐唐兇80後車毀人亡

「80後」青年自去年高鐵撥款後，為政壇帶嚟唔少衝擊，政府應對無力下，身為「50後」嘅政務司司長唐英年尋日出席個會議時，忽然化身「80後」教主，好似開壇說教咁嚴詞訓斥後生仔，仲拋出「車毀人亡」等形容詞嚇人添！

唐唐話，一個真正成熟嘅公民社會，喺重視權利嘅同時，必須自覺承擔責任。言下之意話香港新一代要權利但唔負責。第二樣佢叫年輕人唔好「搞思想壟斷」，不應「對持相反意見的人動輒口誅筆伐」，否則「剛愎自用加上勇往直前，最後很容易車毀人亡！」

佢跟住又話，妥協係民主嘅產物，香港嘅民主路唔能夠「關埋門做皇帝」；講到官商問題時，佢更加嗌啲後生仔唔好「將複雜問題簡單化」，唔好不問青紅皂白，任何事情一涉及政府同商界，就必然得到官商勾結、利益輸送嘅結論，結果只會令大家「懶於理性思考」云云。唐唐警告港人唔願見到流血事件時，又話如果底線一再被衝擊，「我們就有可能走上一條不歸路」，處處靠嚇，咁嘅「50後」老餅腔調點入到「80後」耳呀？